ஜம்புநதி கால்வாய் திட்டத்தை நிறைவேற்ற வேண்டும் - விவசாயிகள் வலியுறுத்தல்.

நெல்லை மாவட்ட ஆட்சியர் அலுவலகத்தில் உள்ள வளர்ச்சிமன்ற கூட்ட அரங்கில் விவசாயிகள் குறைதீர்க்கும் நாள் கூட்டம்  வியாழக்கிழமையன்று நடந்தது. ம.தி.மு.க. கீழப்பாவூர்  ஒன்றியசெயலாளர்  உதயசூரியன் தலைமையில்  விவசாயிகள்  ஆட்சியரிடம்  மனு கொடுத்தனர். 

அதில், “பாவூர்சத்திரம் பகுதியில்  ஜம்புநதி-  ராமநதி கால்வாய் இணைப்பு திட்டம் போடப்பட்டது.  பலஆண்டுகள் ஆகியும் இந்த திட்டம் நிறைவேற்றப்படாமல் இருக்கிறது. நிலம் கையகப்படுத்துதல் பிரச்சினை இருப்பதாக கூறுகிறார்கள்.  இந்த திட்டத்தை விரைந்து செயல்படுத்த ஆட்சியர் நடவடிக்கை  எடுக்க வேண்டும்“ என்று கூறப்பட்டு இருந்தது. 

நெல்லை தொகுதி எம்.எல்.ஏ.லட்சுமணன் ஆட்சியர்  சந்தீப் நந்தூரியை சந்தித்து பேசினார்.  அப்போது அவர் கூறும்போது, “எனது தொகுதிக்கு உட்பட்ட கன்னடியன்  கால்வாய்  பகுதியில் சில இடங்களில் விவசாயிகள் பாசனத்துக்காக  மோட்டார் மூலம் தண்ணீர் எடுத்து வருகிறார்கள். இதை நிறுத்த வேண்டும் எனஅதிகாரிகள் கூறியுள்ளனர். அவர்களுக்கு கால அவகாசம் கொடுக்க வேண்டும்“ என்றார்.