உள்ளாட்சி தேர்தலுக்கான பட்டியல் வெளியீடு

உள்ளாட்சி தேர்தலுக்கு தயாரிக்கப்பட்ட புகைப்பட வாக்காளர் பட்டியலை வெளியிட தமிழ்நாடு மாநில தேர்தல் ஆணையம் உத்தரவிட்டது. அதன்படி நெல்லை மாவட்டத்தில் நெல்லை மாநகராட்சி, 7 நகராட்சிகள், 36 பேரூராட்சிகள், 19 பஞ். யூனியன்களின் வாக்காளர் பட்டியலை நெல்லை ஆட்சியர் அலுவலகத்தில் நேற்று காலை ஆட்சியர் சந்தீப் நந்தூரி வெளியிட மாநகராட்சி கமிஷ னர் சிவசுப்பிரமணியன் பெற்றுக் கொண்டார்.

பின்னர் ஆட்சியர் கூறியதாவது: நெல்லை மாவட்டத்தில் 12 லட்சத்து 34 ஆயிரத்து 112 ஆண் வாக்காளர்களும், 12 லட்சத்து 70 ஆயிரத்து 681 பெண் வாக்காளர்களும், மற்றவர்கள் 68 பேரும் என 25 லட்சத்து 4 ஆயிரத்து 891 வாக்காளர்கள் இடம் பெற்றுள்ளனர். அனைத்து உள்ளாட்சி தேர்தல் நடத்தும் அலுவலகங்களிலும் வாக்காளர் பட்டியல் வெளியிடப்பட்டு உள்ளது. இன்று (ஜூலை 1) முதல் 30ம் தேதி வரை 18 முதல் 21 வயதுக்குட்பட்ட வாக்காளர்கள், விடுபட்ட வாக்காளர்கள் சேர்க்கும் பணி நடக்கிறது. மேலும் ஜூலை 9, 23ம் தேதிகளில் சிறப்பு முகாம் நடக்கிறது. இதனை பயன்படுத்தி புதிய வாக்காளர்கள் வாக்காளர் பட்டியலில் பெயர் சேர்த்துக் கொள்ள வேண்டும். இவ்வாறு ஆட்சியர் தெரிவித்தார்.

மாவட்ட வருவாய் அலுவலர் முத்துராமலிங்கம், மாவட்ட ஊரக வளர்ச்சி முகமை திட்ட இயக்குனர் பழனி, நேர்முக உதவியாளர்கள் வசந்தி (தேர்தல்), தேர்தல் பிடிஓ முருகன் மற்றும் அலுவலர்கள் உடனிருந்தனர்.