செப்பறை அழகிய கூத்தர் கோயிலில் நாளை தேரோட்டம்.

நெல்லை அருகே ராஜவல்லிபுரத்தில் செப்பறை அழகியகூத்தர் கோயில் உள்ளது. பஞ்ச சபைகளில் ஒன்றான தாமிரசபையும், மகா விஷ்ணு, அக்னி பகவான், அகஸ்தியர், அங்கி, வாமதேவரிஷி மற்றும் மணப்படை அரசன் ஆகியோர்களுக்கு சிவ பெருமான் நடன தரிசனம் கொடுத்த சிறப்பு பெற்ற தலமாக இக்கோயில் விளங்கி வருகிறது.

இக்கோயிலில் ஆனி திருமஞ்சன திருவிழா கடந்த 21ம் தேதி கொடியேற்றத்துடன் தொடங்கி நடைபெற்று வருகிறது. 4ம் திரு நாளான கடந்த 24ம் தேதி சுவாமிக்கு திருவாதிரை அபிஷேகம் நடந்தது. இதைத் தொடர்ந்து விழாவின் முக்கிய நிகழ்ச்சியான தேரோட்டம் நாளை (29ம் தேதி ) நடக்கிறது. நாளை காலை 11 மணிக்கு அழகியகூத்தர், தேருக்கு எழுந்தருளும் வைபவமும், பகல் 11 மணி முதல் 12 மணிக்குள் பக்தர்கள் வடம் பிடிக்க இழுக்க தேரோட்டம் நடக்கிறது.

ஏற்பாடுகளை கோயில் செயல் அலுவலர் ஐயர் சிவமணி, தக்கார் முருகன் மற்றும் ஊர் பொது மக்கள் செய்துள்ளனர்.